“Eibar lagunkoia” eguneratu du Udalak, erronka sozial berriei aurre egiteko eta adinekoen parte-hartzea indartzeko

“Eibar Lagunkoia” prozesuaren fase berri bat jarri du abian Eibarko Udalak. Ekimen estrategiko honen helburua da herritarren —batez ere adinekoen— bizi-kalitatea hobetzea eta aurrera egitea udalerri irisgarriago, inklusiboago eta adin guztietara egokituago baterantz.

Une honetan, 2018an onartutako ekintza-plana ebaluatzen ari dira. Harrezkeroztik, gizartean gertatu diren aldaketa sakonen ondorioz —pandemiaren inpaktuak eragindakoak, besteak beste—, beharrezkoa da hartutako neurrien betetze-maila berrikustea, izandako lorpenak identifikatzea eta oraindik hobetzeko tartea duten arloak hautematea.

Jon Iraola alkateak prozesu honen garrantzia azpimarratu du, epe luzeko planifikazio tresna gisa: “Azken urteetan Eibarrek erakutsi du bere herritarren ongizatearekin konprometitutako herri bat dela. Orain beste urrats bat eman nahi dugu. Egindakoa ebaluatu eta etorkizunari anbizioz begiratu nahi diogu, pertsonen benetako premiak zaintzen, entzuten eta erantzuten dituen udalerria izaten jarraitzen dugula bermatzeko”.

Planaren ebaluazioan eta otsailean egindako azterketa sozialean oinarrituko dira diagnostiko berri eta eguneratu bat egiteko. Hortik abiatuta, adineko pertsonen bizi baldintzetan sakonduko da, haien beharrak, pertzepzioak eta proposamenak xehetasun handiagoz ezagutzeko asmoz.

Prozesuaren amaieran, ekintza-plan berri bat definituko da, lau urterako, egungo erronkei erantzun eta etorkizunari aurrea hartzeko diseinatuta egongo dena. 

Bestalde, Sonia Archeli Gizarte Zerbitzuetako zinegotziak ekimenaren izaera dinamiko eta parte-hartzailea azpimarratu du: “Eibar Lagunkoia proiektu bizia da, gure gizartearen errealitate aldakorrera egokitu behar dena, eta, zehazki, pertsona nagusien beharretara. 2018ko planaren ebaluazioaren eta azken urteetan izandako aldaketen ondoren, funtsezkoa da herritarrei entzutea eta haien egunerokotasunean zuzenean eragiten duten faktoreetan sakontzea. Plan errealista, erabilgarria eta partekatua eraiki nahi dugu, eta Pertsona Nagusien Mahaia funtsezko pieza izango da prozesu honetan”.

Hain zuzen ere, Pertsona Nagusien Mahaiaren parte-hartze aktiboa izango da etapa berri honen oinarrietako bat. Organo aholkulari horrek bermatuko du kolektibo honen esperientzia eta ahotsa proiektuaren fase guztietan egotea, eta diseinatzen diren politika publikoak udalerriko gizarte-errealitatera gehiago egokitzea.

Gogoratu behar da “Eibar Lagunkoia” 2015ean hasi zela, Udalak bat egin zuenean adinekoekin adeitsuak diren herrien sarearekin, eta, harrezkero, lan-ildo bat finkatu da zahartze aktiboan, autonomia pertsonalean eta herritarren parte-hartzean oinarritutakoa.