Egogain kaleko irisgarritasuna hobetuko du Udalak

Udalak jarduketa berri bat iragarri du Egogain kalean, udalerriko eremu jendetsu horretako irisgarritasuna hobetzeko. Lanak atzo hasi ziren eta bi asteko iraupena izango dute. Estali egingo dira lurpeko edukiontzi zaharrek utzitako zuloak eta beheratu egingo da zebra-bideko espaloia; hala, mugikortasun urriko pertsonentzat irisgarritasun handiagoa ahalbidetuko da. 18.000 euroko aurrekontua duen obra honek inguru horretako bizilagunen eskari bati erantzuten dio.

Izan ere, hainbat abisu jaso ziren herritarren aldetik, oinezkoentzako pasabidea egokitzeko beharra adieraziz, segurtasun eta irisgarritasun handiagoa bermatze aldera. Zulo horiek kentzeko eta espaloia egokitzeko obrak ahalbidetu egingo du horko igarobidea  erosoagoa eta seguruagoa izatea, eta erraztu egingo du oinezkoen eta mugikortasun mugatuko pertsonen edo laguntza teknikoak (gurpil-aulkia edo makilak) erabiltzen dituzten pertsonen zirkulazioa.

“Esku-hartze honek Eibarko bizilagunen eskari bati erantzuten dio, toki horren egoeragatik kezkatuta daudela adierazi digute-eta. Udalean erantzun bat eman diogu eskabideari, espazio publikoaren segurtasuna eta irisgarritasuna hobetzeko", adierazi du Jon Iraola Eibarko alkateak.  “Horrelako jarduketak funtsezkoak dira gure kaleak pertsona guztientzat irisgarriak eta seguruak izango direla bermatzeko, pertsonen mugikortasun maila edozein izanda ere.”

Gainera, Udalak nabarmendu du obra hau hiri-irisgarritasuna hobetzeko plan zabalago baten parte dela, zeinean lehentasuna ematen zaion  mugikortasun urriko pertsonentzat oztopoak edo zailtasunak dituzten eremuak egokitzeari. Egogaineko proiektu honekin, Udalak hiri inklusibo eta irisgarri bat eraikitzeko konpromisoa berresten du, non herritar guztiak muga fisikorik gabe mugitu ahal izango diren.