Aurrera doaz mendekotasun arina duten adinekoentzako tutoretzapeko apartamentu berriak

Eibarko Udalak aurrera jarraitzen du I. graduko mendekotasuna duten adinekoentzako tutoretzapeko apartamentu berrien lanekin. Proiektuaren izapideak amaitu ondoren, obrak egiten ari dira Gizarte Zerbitzuen Euskal Sistemaren prestazio-zorroan sartuta dagoen baliabide berri hau errealitate bihurtzeko.

Jarduketak 572.413 euroko inbertsioa dakar, % 75 dirulaguntza bidez finantzatuta, eta intentsitate txikiko egoitza-baliabide bat eskaintzea ahalbidetuko du, ostatua, laguntza profesionala, gainbegiratzea eta, beharrezkoa denean, arreta pertsonala konbinatuko dituena. Guneak zerbitzu osagarriak ere izango ditu: mantenua, arropa garbitzea edo garbiketa-lanak.

Proiektuan tutoretzapeko bederatzi apartamentu eta horiei atxikitako lokal bat egokitzea aurreikusten da. Beheko solairuan harrera-lekua, erabilera anitzeko gela, bulegoa, bainugela eta garbitegia egongo dira. Apartamentuak bizitegi-erabilerarako solairuetan kokatuko dira, sukaldea, logela eta bainugela duten egongela-jangelarekin, eta horietako batzuek kanpoaldeko terraza izango dute, espazio ireki eta erosoak eskaintze aldera.

Pertsona batentzat edo birentzat egokitutako apartamentuak egongo dira, baita bizikidetza-unitateentzako etxebizitza bat ere, pentsatuta dagoena mendekotasun arina duen pertsona bat desgaitasuna duen edo eguneroko bizitza egiteko zailtasunak dituen beste batekin bizi den kasuetarako.

Eraikinak, era berean, langile profesionalentzako espazioak izango ditu, bai eta gune komun bat ere, elkarbizitza, parte-hartzea eta zahartze aktiboa sustatzeko talde-jarduerak egiteko.

Horrez gain, udala aztertzen ari da higiezin berean eguneko arreta-zerbitzua jartzeko aukera, egoiliarrentzat zein mendekotasun arina duten beste bizilagun batzuentzat. Baliabide horrek informazioa, jarraipena, gizarte eta hezkuntza arloko esku-hartzea eta esku-hartze psikosoziala eskainiko ditu, baita akonpainamendu soziala ere, dagoeneko herriko adinekoen beste zentro batzuetan egiten den lana indartuz, nahi gabeko bakardadeari aurrea hartzeko eta zahartze osasuntsua sustatzeko.

Sonia Archeli Gizarte Zerbitzuetako zinegotziak azpimarratu duenez, "obrak martxan jartzea urrats garrantzitsua da Eibarko adinekoei arreta emateko baliabideak zabaltzen jarraitzeko. Proiektu honi esker, ingurune seguru, irisgarri eta egokitu bat eskainiko da, non pertsonek beren autonomiari eutsi ahal izango dioten, behar duten laguntza profesionalarekin eta, aldi berean, bizikidetza aberasgarriaz gozatuz".

Bestalde, Jon Iraola Eibarko alkateak zera adierazi du: "Obren hasierarekin pauso erabakigarria ematen dihardugu herriarentzako proiektu estrategiko bat gauzatzeko. Adinekoei beren bizi-proiektua ahalik eta autonomia handienarekin garatzen jarraitzeko aukera emango dieten alternatibak eskaini nahi ditugu, inguru hurbil, seguru eta kalitatezkoan. Udalak pertsonak oinarri hartzen dituen zaintza eredu humanoago eta prebentiboago batekin duen konpromisoari erantzuten dio baliabide honek".