Edukira salto egin | Salto egin nabigazioara

‘Basque Precision Technology District’, Debabarreneko sektore industrialaren aldeko apustu gisa sortu den marka berria

2018/11/20

Nazioartean ezaguna den ekintzailetza-tradizio batean eta ekosistema sozioekonomiko paregabe batean oinarritutako ikuspegi batetik abiatuta. Eskualdeko ekonomiaren hazkunde iraunkorra sustatzeko asmo garbiarekin, industria-sarearen lehiakortasuna hobetuz. Besteak beste, doitasun-teknologien, 4.0 industriaren, robotikaren eta automatikaren alde egiten.

Gaur goizean aurkeztu da Debegesa eskualdeko Garapen Agentzian Basque Precision Technology District marka. Helburu nagusia Debabarreneko industria-sektorea sustatzea eta nazioarteko merkatuan eskualdearen gaitasun lehiakorraren posizionamendua laguntzea da.

Basque Precision Technology District Debabarreneko eskualdeko eragile publikoen eta pribatuen apustua da, nazioartean ezaguna den ekintzailetza-tradizio batean eta ekosistema sozioekonomiko paregabe batean oinarritutakoa. Ekosistemaren parte dira: bi teknologia-zentro (IK4-Ideko eta IK4-Tekniker), lanbide-heziketako sei zentro (Armeria Eskola, IMH, Meka, Mutrikuko Institutua, Uni Eibar-Ermua eta Kardala Akualkultura Eskola), ETE-entzako berrikuntzako eta transferentzia teknologikoko zentro bat (Asmaola), EHUren bi egoitza (Eibarko Ingeniaritza Tekniko Industrialaren Unibertsitate Eskola eta IMHko Ingeniaritza Dualaren Unibertsitate Eskola) eta, makina erramintaren edota automobilgintzako sektore laguntzailearen balio katearen industria-kontzentrazio garrantzitsua, hurbileko zerbitzu ona emateko eta edozein fabrikazio-proiekturi aurre egiteko aukera ematen duena.

Industria-trebetasunari eta ekosistema honi guztiari esker, enpresa-talde handiak eta euren sektoreetan aitzindariak diren enpresak sortu dira Debabarreneko eskualdean. Talde eta enpresa horietako batzuk dira: Danobat Group, Etxe-Tar Group, CIE taldea, Egile taldea, Mek taldea, Maher Holding, Cometel taldea, EPC Group, Orbea, ABC Compressors, Jaz Zubiaurre, Masermic, Microdeco eta AVS Added Value Solutions.

Proiektua Debegesa eskualdeko Garapen Agentziak kudeatzen du eta Eusko Jaurlaritzako Ekonomiaren Garapen eta Azpiegitura Sailak finantzatu du, SPRIren bitartez.

Ekitaldian parte hartu dute Eibarko Udaleko Garapen Ekonomikoa, Enplegua eta Berrikuntza saileko zinegotzi den Alberto Albisteguik, Debabarreneko Udaletako alkate eta alkateordeek, SPRIko zuzendari nagusiak, Alex Arriolak, Gipuzkoako Foru Aldundiko Ekonomia Sustapeneko zuzendari nagusiak, Garikoitz Agotek, eta Debegesa garapen agentziako zuzendari nagusiak, Juan Angel Balbasek 

Debabarrena, industria-barrutia

Debabarreneko eskualdeak tokiko identitate kultural sendoa eta industria eta fabrikazio arloan eskarmentu handia du. EAEko hiru hiriburuen artean kokapen estrategikoa duen industria-barrutia da. Komunikazio onak ditu eta aukera handiak bere posizionamendu estrategikorako; aprobetxatu eta indartu beharrekoak.

Honela, Basque Precision Technology District eskualdeko ekonomiaren hazkunde iraunkorra sustatzeko asmo garbiarekin sortu da, industria-sarearen lehiakortasuna hobetuz, eta, besteak beste, doitasun-teknologien, 4.0 industriaren, robotikaren eta automatikaren alde egiten.

Debegesako zuzendari nagusiaren hitzetan, nabarmentzekoa da eragile publikoen eta pribatuen artean modu kolaboratiboan lan egin izana, eta adierazi duenez, “Basque Precision Technology District aukera ezinhobea da Debabarrena nazioarte mailan inbertsioak erakartzeko lurralde erakargarri gisa kokatzeko, horiek lagunduko baitute talentua eta jada eskualdean kokatuta dauden enpresak atxikitzen, industriara bideratutako izaera ekintzailea sustatzen, eta Debabarreneko hiri eta herriak bizitzeko leku atsegin eta erakargarri gisa balioan jartzen”. 

Marka berriarekin batera, www.bptd.eus webgunea aurkeztu da; euskaraz, gaztelaniaz eta ingelesez, Debabarreneko produkzio-baliabideak eta ahalmena erakutsiko da bertan, Basque Precision Technology District gisa.

‘Basque Precision Technology District’, Debabarreneko sektore industrialaren aldeko apustu gisa sortu den marka berria

‘Basque Precision Technology District' marka aurkezteko egin den prentsaurrekoa.